Kidkiddawen dagiti sumagmamano nga indibidual a maisimpa ti bubong ti overpass iti Malcolm Square Barangay, Baguio City.
Daytoy ket gaputa adu gamin ti abut ti bubong iti overpass nga isut rason met a mabasbasa dagiti “passersby.”
Malaksid iti dayta, maur-urnong pay ti danum iti dalan mismo ti overpass a gapuanan met dagiti tattao a mangliklik a magna, a rason ti nabuntog a gunay dagiti tattao.
Sigun kadagiti nakapatang ti Bombo Radyo, nabayagen a pakaseknan daytoy ti publiko mano a tawenen ti napalabas.
Sigun kenni Robert Gray, sangapulo ket walo a tawen nga aglaklako iti asideg ti overpass, tallo a termino ti nagtugaw iti management ti Maharlika Livelihood Complex ngem agingga iti agdama ket saan pay a narisut ti pakaseknanda.
Kinunana nga impakaamona ti nasao a pakaseknan iti management ti nasao nga establisimiento idi napalpalabas a tawen ngem awan ti inaramid nga addang dagiti nakatugaw nga opisial iti dayta a panawen.
Adu dagiti natataengan ti agdamdamag kenkuana nu adda ti mangisimpa ti nasao a pakaseknan, ngem kas sungbat, kinabilanna laengen daytoy ti temporario a pagayusan ti danum.
Kabayatanna, iti panagturong ti Bombo Radyo iti opisina ti management ti Maharlika Livelihood Complex, dagosda nga inaksionan ti pakaseknan nangruna iti paset ti napigsa nga agtedtedted kalpasan a naawatda ti feedback a naipadanon manipod iti publiko.
Sigun kenni Jennifer Aritao, Supervising Administrative Officer ti Maharlika Livelihood Complex, basura ti maysa a rason isut gapuna nga agtedted ti danum iti overpass.
Aklonenda a nabayagen ti pasdek isut gapuna a mabetbettak wenno maab-abutan dagiti sumagmamano a paset ti “building.”
Impasiguradona nga aramidenda ti kabaelanda kas opisial ti nasao nga establisimiento iti kabiitan a panawen.
Iti agdama, ad-adalenda ti long term solution seknan iti nasao a banag.
