BAGUIO CITY – Umap-apela kadagiti umili dagiti barangay officials ti Loakan Proper ken Camp 7 ditoy siudad ti Baguio para iti dagus a panangireportda kadagiti otoridad iti amin a maobserbaranda a panagtupada wenno iligal a pallot iti uneg ti barangay dagitoy.
Kinuna ni Loakan Proper Punong Barangay Eduard Cayetano a napasardengen ti Baguio City Police Office – Station 4 ti iligal a panagpallot sadiay Ongasan sakbay pay ti social media post ni Mayor Benjamin Magalong a mangiyap-apela iti panagaksion ti pulis iti iligal a sugal iti masakupan dagitoy.
Dinakamatna nga idi laeng Lunes ket adda ti rinebbek dagiti pulis a pallotan sadiay Ongasan ngem awan ti natiliwda a suspek kabayatan ti operasyon.
Sigun kenkuana, nabaybayagen nga adda ti mairepreport a panagpallot iti barangayda ngem paspasardengen daytoy ti pulisya.
Innayonna a dagiti maibagbaga a pallot ket naidulin wenno nailemmeng gaputa maisaysayangkat kadagiti igid a paset ti barangay.
Kabayatanna, naklaat met ni Camp 7 Punong Barangay Angelina Ramos iti panakairaman ti barangayda kadagiti naipablaak iti page ni Mayor Magalong a pakaisaysayangkatan ti panagtupada.
Sigun kenkuana, idi pay Marso nga adda ti naireport kadakuada a panagtupada iti masakupanna ngem awan ti natiliw iti panagresponde dagiti otoridad.
Kinunana nga idi metlaeng napalabas a tawen nga adda ti natiliw iti masakupanda gapu iti panagpallot.
Nupay kasta, impanamnamana nga agtultuloy ti panangbantayda iti masakupanda nangruna sadiay Youngland, Camp 7.
