Impasigurado ni Laarni Ilagan, Community Relations Associate ti Benguet Electric Cooperative (BENECO) ti dagus a pannakaisubli ti suplay ti kuryente kadagiti nagduduma a lugar iti siudad ti Baguio ken iti probinsya ti Benguet a naapektaran gapu paylaeng iti bagyo a Pepito.
Iti pannakiuman ti Bombo Radyo kenkuana, kidkiddawen ti pannakaawat dagiti member-consumer nangruna dagiti naapektaran iti pannakapukaw ti suplay ti kuryente.
Sigun kenkuana, adda dagiti sumagmamano a nakapasar iti power interruption ngem dagus metlaeng a naisubli daytoy ngem dadduma kadagitoy ket saan paylaeng a naisubli.
Kinunana a nakaawat dagitoy iti awag manipud idi rabii agingga idi agsapa rason a dagus met a nagresponde dagiti linemen dagitoy.
Kabayatanna, nagyaman met daytoy iti publiko iti pannakaawatda iti napasamak a power interruption gapu kadagiti natumba a kaykayo ken dadduma pay.
