BAGUIO CITY – Kidkiddawen ti lokal a gobyerno ti boluntaryo nga ipapanaw dagiti chicken dung traders sadiay Barangay Shilan, La Trinidad, Benguet.
Iti interview ti Bombo Radyo Baguio, kinuna ni Mayor Romeo Salda a nangiruardan ti closure order idi pay Lunes, Nobyembre 28.
Daytoy ket kalpasan a naawatna ti resolusyon manipud iti Sangguniang Bayan a saanen a mailaylayon ti kiddaw dagiti chicken dung traders a pawayway.
Impetteng ni Salda a nu saan paylaeng a pumanaw dagiti chicken dung traders iti kabiitan a panawen ket kapilitan a maaramat ti police power.
Immunan nga inreklamo dagiti umili ti saan a nasayaat nga angot nga agtataud iti paglaklakoan ti abono.
Inlawlawag met ti mayor nga awan ti ordinansa ti La Trinidad a mangipalpalubos iti panaglako ti abono iti masakupanda a municipyo.
Gapu iti daytoy, naibilin ti relocation site kadagiti chicken dung traders.
