BAGUIO CITY – Mangnamnama ti Hotel and Restaurant Association of Baguio (HRAB) a sakbay ti ngudo ti agdama a tawen ket marugianen ti rehabilitasyon ti Loakan Airport.
Sigun kenni Andrew Pinero, media relations officer ti HRAB, babaen iti daytoy ket marugianen dagiti biahe a mabalin a pagluganan daigti adu a balikbayan nga umay ditoy siudad iti holiday season.
Nupay kasta, kinunana nga agdependar latta ti sitwasyon iti pinal a katulagan dagiti airlines ken dagiti maseknan nga opisyales ken ahensia a makisarsarita kadagitoy para iti nasao a plano.
Innayonna a dakkel a makatulong iti panagsangpet dagiti turista iti siudad ti panakaisimpa ti Loakan Airport ken ti panakabiag dagiti airlines a mangipaay iti serbisyo para iti biahe a Baguio-Manila.
Imbingayna nga adda ti airline a kasarsaritada seknan iti nasao a biahe ken daytoy ket ti agtagikua iti eroplano a naaramat iti panakaiturong ditoy siudad dagiti kandidata idi iti Miss Universe.
Sigun pay kenkuana, addan iti pinal a paset ti saritaanda iti nasao nga airline tapnu ti agbalin a plete ket dagiti gatad a kabaelan ti kaaduan tapnu adu ti agbalin a pasahero daytoy.
