BAGUIO CITY – Nailatang iti health sector ken social welfare sector ti Baguio ti kadakkelan a paset iti pondo ti siudad para inton sumaruno a tawen 2021.
Sigun kenni Mayor Benjamin Magalong, manipod iti naaprobaran a P1.904-B a pondo ti Baguio para iti 2021 ket 15% ti maipaay iti health sector.
Kinunana a daytoy ket gaputa a nasken a matutukan ti pakaseknan iti salun-at nangnangruna ita nga adda ti pandemya gapu iti COVID-19.
Impettengna a nasken metlaeng a mamintinir dagiti pasilidad para iti COVID-19 ken manayunan ti manpower nangnangruna ta napalubusan ti panagturong dagiti turista ditoy siudad.
Innnayonna a tutukan pay ti lokal a gobyerno ti panakapapigsa ti salun-at ken sa ti immuno system ken psychosocial dagiti amin nga umili ti siudad.
Maipalagip a nababbaba ti pondo ti Baguio para iti 2021 no idilig iti pondo ti siudad ita a tawen.
