BAGUIO CITY – Pinaglibakan ni City Administrator Engr. Bonifacio dela Peña ti damag a maipasidong ti Baguio City iti Alert Level 3 COVID-19 risk classification ti pagilian.
Iti interview ti Bombo Radyo Bagiuo, inlawlawagna nga agtalinaed iti Alert Level 2 with heightened restrictions ti siudad mangrugi intun bigat, Enero 6 agingga Enero 18 kas maibasar iti pammilin ti National IATF.
Nupay kasta, impaganetgetna a maipatungpal laeng dagiti sumagmamano nga heightened restrictions kagiddan ti pangta ti Omicron variant ken ti pannakaipasidong dagiti sumagmamano a lugar iti Alert Level 3.
Kangrunaan ditoy ti kanayunan nga requirements para kadagiti non-essential ken essential travels nga agtaud kadagiti lugar iti ALert Level 3 nga agturong ditoy siudad iti laksid ti vaccination status dagitoy.
Inlawlawagna met a saan nga agbalin a rason ti ngumatngato manen a kaso ti siudad tapnu basaran iti pannakapasidong iti Alert Level 3 gaputa minimal wenno bassit paylaeng daytoy ken kabaelan nga maimanihar.
Inkalinteganna met a nakasagana ti siudad iti panagngato manen ti kaso gapu iti Omicron variant ken iti kanito a mabilin ti Alert Level 3 nga status ti siudad.
Maipalagip nga epektibo inton bigat, Enero 6 ket agbalin laengen nga 4,000 manipud ti awaten ti siudad a turista tunggal aldaw manipud iti sigud a 5,000.
Mapalubosan a sumrek iti siudad dagiti nagrehistro iti Baguio VISITA a naipaayanen ti QTP sakbay ti Enero 2 depende iti naaprubaran nga aldaw.
Para kadagiti bisita nga agtaud iti Alert Level 3 areas kas ti Metro Manila, kasapulan a mangiparangda ti negatibo a resulta ti RT-PCR test wenno Antigen Test malaksid pay iti vaccination card dagitoy.
Para met kadagiti bisita nga agtaud iti Alert Level 2 areas kas ti Tarlac ken Pangasinan, saanda a kasapulan a mangiparang ti negatibo a resulta ti COVID-19 test la ketdi adda ti vaccination card dagitoy.
Mailaksid dagiti minor de edad iti vaccination card wenno vaccination certificate.
Kabayatana, ti red-shaded dates iti Baguio VISITA ket kaipapannana a nakompleton ti 4,000 a bilang isu’t gapuna nga agsapul manen dagiti bisita iti baro a petsa ken ti bakante a hotel nga addaan ti bukkodda a triage a pagdagusanda kabayatan ti panagtalinaedda ditoy siudad.
Limitado laeng iti 70% ti kapasidad dagiti bisita a rumbeng nga akomodaren dagiti accomodation establishement ditoy siudad.
Kabayatanna, para met kadagiti APORs, essential/business travels, medical /professional appointments, students, workers/employees ken returning residents ket nasken nga agrehistroda iti hdf.baguio.gov.ph.
Guyguyuguyen met ni De la Pena dagiti agtaud kadagiti naipasidong iti Alert Level 3 a dumalan iti umno a proseso sakbayda a sumrek iti siudad bayat a dagiti residente ket naballaagan nga agtalained kadagiti babbalayda nu awan ti napateg nga rangtada iti parapubliko a lugar.
Kagiddan iti dayta, inayona a maituloy latta dagiti nagduduma nga aktibidad gaputa maipatungpal latta dagiti naing-inget a restrictions.
Karamanen ditoy dagiti eksaminasyon nga ipatpatungpal ti Professional Regulation Commission (PRC) a paspasetan metlaeng dagiti examinees manipod iti ruar ti siudad.
