BAGUIO CITY – Pinaglibakan ti opisina ti City General Services ti agwarwaras a damag a saanda nga agkolektar ti “biodegradable” wenno nabubulok a basura iti siudad ti Baguio.
Iti exclusive interview ti Bombo Radyo kenni Eugene Buyuccan, City General Services Officer, kinunana nga awan ti aniaman a naipaulog a pammilin maipapan iti nasao a banag.
Sigun kenkuana, naklaat ti opisinana kalpasan nga adda dagiti agririri nga indibidual nga adda dagiti sumagmamano a barangay a saan a mangal-ala kadagiti basura a “nabubulok.”
Inlawlawag ni Buyuccan a numan pay naipaulog ti RA 9003 idi 2001, nu sadinno, nakalanad a kasapulan a kolektaren ti city government ti “residual waste” bayat a ti special waste wenno ti nabubulok a basura ket imanehar ti barangay, awan ti maaramidanda a saan a kolektaren ti basura gaputa agbalin a pakaseknan daytoy iti salun-at.
Aklonen ti nasao nga opisial a saan nga amin a nabubulok a basura ket maibelleng iti sanitary field gaputa nakaro ti angotna nangruna kadagiti residente sadiay Tuba, Benguet.
Ngem nupay kasta, impaganetgetna nga agtultuloy latta ti panagkolektarda ti aniaman a basura la ketdi naka-segregate daytoy.
