![](https://img.bomboradyo.com/baguio/2019/11/Adhara-Perez.png)
Nadiskobre ti maysa nga ubing a babai sadiay Tlahuac, Mexico nga addaan intelligence quotient wenno IQ a 162 – nangatngato no iti 160 nga IQ da theoretical physicists Albert Einstein ken Stephen Hawking.
Nupay kasta, sakbay a nadiskobre ti full potential ti 8-year-old genius a ni Adhara Perez ket nagbalin a biktima daytoy ti panag-bully.
Sigun iti inana, nagduduma ti panang-awag dagiti dadduma nga ubbing kenni Adhara ken naminsanen nga inkulongda iti maysa a bassit a playhouse.
Gapu iti daytoy, nagsagaba ni Adhara iti depression gapu iti bullying.
Inrekomendar met ti psychiatrist ni Adhara ti panakaipasidongna iti Talent Care Center ken ditoy a naduktalan ti outstanding IQ daytoy.
Iti baet met ti kondisyon ni Adhara nga Asperger Syndrome wenno Asperger’s a maysa a developmental disorder, nalpasna ti elementarya iti tawenna a lima ken nagturpos iti middle school iti tawenna nga innem.
Iti tawenna a walo, maysan a high school graduate ni Adhara ken ita ket agsagsaganan para iti panagturongda sadiay United States tapnu agadal daytoy iti astrophysics ken matungpal ti arapaapna nga agbalin nga astronaut.
Naamuan nga ita ket agal-ala ni Adhara iti dua nga online degrees – industrial engineering in mathematics iti Universidad Tecnológica de México ken systems engineering iti sidong ti Comprehensive National Cybersecurity Initiative.
Nakaisurat pay ti ubing iti maysa a libro nga addaan titulo a “Do Not Give Up”.