BAGUIO CITY – Pinaglibakan ti dadaulo ti Baguio City Police Office – Station 2 ti agwarwaras a damag iti social media nga adda ti kinidnap ti maysa a van a dua nga estudyante iti masakupanda, partikular sadiay Barangay Pinsao Proper.
Iti panakiuman ti Bombo Radyo kenni PCI Gil Imado, dadaulo ti BCPO Station 2, kinunana nga awan ti naaw-awatda a report mainaig iti nasao a banag.
Innayonna a nu pudno ti nasao nga insidente ket adda kuma ti nagpa-blotter iti opisinada a nagannak dagiti nasao nga estudyante wenno report dagiti maseknan a barangay officials.
Gapu iti daytoy, impalagipna manen iti publiko a sakbay nga agi-post wenno agipablaak dagitoy iti aniaman a damag iti social media ket nasken a kumpirmarenda pay no pudno wenno saan.
Impettengna a babaen iti nasao a wagas ket maliklikan ti panaka-alarma ti publiko.
Insingasingna pay a no asinoman dagiti mangi-post iti saan a pudno a damag ket dagitoy metlaeng a mismo ti agkiddaw ti pammakawan no mapaneknekan a biddut ti impadamag dagitoy.
