BAGUIO CITY – Duktuktalan paylaeng dagiti otoridad ti pakabigbigan ti ina a nangibelleng iti fetus nga anakna iti transfer station dagiti basura sadiay Dairy Farm iti Barangay Dontogan, siudad ti Baguio idi Biyernes, October 25.
Nadiskobre ti maysa nga scrapper ti nasao a lalaki a fetus kabayatan ti panagkalkalna kadagiti basura iti nasao a disso.
Sigun kenni Michael Innad, foreman iti garbage tranfer area, nabalkot iti maysa a transparent plastic bag ti fetus sakbay a naikabil iti garbage bag.
Kinunana a karaman ti garbage bag kadagiti inakopda a basura ngem saanda nga ammo ti partikular a lugar a nakaakopan daytoy.
Naamuan a ti kaudian a nag-akopanda iti basura idi Biyernes ket sadiay Legarda Road, Teacher’s Camp, Purok 17 iti Barangay Irisan ken iti deppaar ti Naguilian Road.
Dagus a naipaka-ammo ti insidente iti Baguio City Police Office – Station 10 ken kadagiti opisyal ti Barangay Dontogan.
Naiturong ti fetus iti maysa a chapel para iti panakabendisyonna sakbay a naiturong iti maysa a punerarya para iti panakaitabon daytoy.
