BAGUIO CITY – Pinaglibakan ti dadaulo ti La Trinidad Municipal Police Station ti nagwaras a damag iti social media nga adda manen dagiti naka-van nga agrikrikos iti lokalidad a mangipatpatungpal ti kidnapping.
Iti panakiyuman ti Bombo Radyo kenni PCI Benson Macli-ing, kinunana a saan a pudno ti nasao a damang nangruna ta sipud nagtugaw kas dadaulo ti pulisya sadiay ket awan ti nairepreport iti opisinada mainaig iti nasao a kaso.
Kinunana a rinabii a tallo a mobile ti pulisya ti agrikrikos iti munisipyo tapnu maipakita ti presensia dagitoy.
Kiniddawna met ti saan a basta latta panangipost dagiti umili iti aniaman a damag ngem ketdi, agturongda iti kwerpo ti pulisya tapnu ireklamo no adda dagiti nakitada a kaso ti panagkawtibo.
Innayon ni Macli-ing a babaen iti daytoy ket maipaay ti pulisya ti umno nga aksion ken makita no pudno wenno saan ti kaso.
Maipalagip a manipud iti umuna a lawas ti agdama a bulan ket nagwaras manen ti damag mainaig iti panagkawtibo iti lokalidad babaen iti nagduduma a wagas.
