BAGUIO CITY – Nainget a pinaglibakan ti Baguio City Police Station (BCPO) ti nagwaras a damag mainaig iti panakahold-up dagiti tallo a taxi drivers idi kanaikadua, pakairamanan ti maysa a taxi driver a nabagsol sadiay Poliwes Barangay.
Iti panakiuman ti Bombo Radyo kenni PCI Francisco Cacas Jr., commander ti Station 8 ti BCPO, kinunana a dagusda a nangipatungpal ti follow-up investigation apaman a naamuanda ti nasao a damag nga immuna a nagwaras iti facebook ken iti text message nangruna ta awan ti naaw-awatda a report mainiag iti daytoy.
Kinunana a kinapatangda dagiti taxi drivers mainaig iti damag ngem naamuanda a nangngeg laeng dagiti nasao a drivers ti damag babaen iti handheld radio iti taxi nga imanmaneho dagitoy agingga nga adda ti nangipost iti social media.
Dinakamatna nga iti naiwaras a text message ket nailanad a ti taxi driver a nabiktima ti hold-up sadiay Poliwes ket ni Pedro Bilog.
Kinapatang met dagiti pulis ti nasao nga indibidual ket ditoy a naamuanda a maysa daytoy a taxi operator ken saan a pudno a biktima daytoy ti hold-up.
Innayonna a nagrikosda pay kadagiti ospital ngem awan ti na-admit kadagitoy a biktima ti pammagsol.
Gapu iti daytoy, kidkiddawen ni Cacas iti publiko a no adda man ti sakit ti nakemda iti maysa a taxi driver wenno operator ket saanda a mangpartuat iti palso a damag mainaig iti kagurada ken saanda nga iwarwaras daytoy.
Impettengna pay a nangitunda iti negatibo a reaksion manipud iti publiko ti panagwaras ti damag a panaka-hold-up ti tallo a taxi drivers ditoy lokalidad idinto ta saan a pudno dagitoy.
