BAGUIO CITY – Agtultuloy ti panagwaras iti social media dagiti mapukpukaw nga indibidual ditoy Baguio City pakairamanan dagiti dadduma a munisipyo ken probinsya ti rehiyon Cordillera.
Gapu iti dayta, dakkel daytoy ita a pakaseknan dagiti otoridad ken saan a maliklikan nga adda iti panagbuteng ita kadagiti umili.
Malaksid iti dayta, mapapati payen nga adda dagiti grupo a mangkawkawtibo kadagiti mapukpukaw nga indibidual ken saan a natalged ita ti syudad gapu kadagitoy a damag.
Nupay kasta, inmunan a pinunas dagiti otoridad ti nasao a panagbuteng agsipod ta rumrumwar iti imbistigasyonda a nagtalaw laeng dagiti mapukpukaw kadagiti pagtaenganda.
Iti baet ti dayta, saan ngata a rumbeng nga agbuteng dagiti umili?
Idi laeng kalman, nasarakan ti maysa a bangkay sadiay Sablan, Benguet a nangbangon manen iti kapanunutan dagiti umili a posible a maysa daytoy kadagiti mapukpukaw nga indibidual.
Kagiddan iti dayta, inpanamnama met dagiti otoridad iti panangipaayda iti nainget nga imbistigasyon kadagiti amin a report a maaw awatda seknan kadagiti mapukpukaw.
Nupay kasta, rumbeng metlaeng nga aramiden dagiti umili iti responsibilidad dagitoy nga agbalin a naridam kasta metten iti panangipaayda iti tulong kadagiti otoridad babaen iti panangiwarasda kadagiti umno a damag tapnu saan a makasinga kadagiti imbistigasyon ken addang nga ar aramiden dagitoy.
