Dandani 7 million a raliyista ti nakikaykaysa iti naipatungpal a tignay-protesta iti nagduduma a lugar idiay Estados Unidos idi Sabado pakairamanan iti Washington DC, New York, Los Angeles, Chicago, ken Miami.
Daytoy ti maikadua a gundaway a naisayangkat ti “No Kings” protest nga immunan a naisayangkat idi Hunyo a dinar-ayan met dagiti agarop 2 million a raliyista.
Ti nasao a tignay-protesta ket kas panangipakita iti saanda a panangkanunong kadagiti polisiya ni United States President Donald Trump.
Gapu iti nasao nga aktibidad, nangiwaras dagiti daduma nga estado sadiay kadagiti National Guard.
Sakbay ti tignay-protesta, inakusaran dagiti kaalyado ni Trump dagiti raliyista nga adda pakainaigan dagitoy iti far-left Antifa movement.
Kinondenarda ti nasao a tignay ken inawaganda daytoy a “the hate America rally”.
Iti baet dayta, inkalintegan met dagiti nangorganisar kadagiti nasao nga aktibidad a natalna ti panakaipatungpal dagitoy.
