Kinumpirmar ti New York Police Department (NYPD) a naarestar ti 282 pro-Palestinian protesters iti Columbia University ken City College of New York itay laeng kanikadua ti rabii ken posible pay a manayonan ti bilang ti maarestar iti Fordham University .
Daytoy ket gapu iti panagprotestada kontra iti Israel.
Malaksid iti dayta, sinnerrek pay dagiti otoridad ti Columbia University ken kinemmegda dagiti pro-Palestinian protesters a nagnaed iti maysa a pasdek sadiay.
Nangrugi ti panagprotesta idi nilapdan dagiti studiante ti pagserkan ti Hamilton Hall iti kampus ti Columbia ken inukradda ti watawat ti Palestine manipod iti tawa.
Idi laeng kalman ti agsapa, nangideploy ti US police ti puersa dagiti otoridad iti uneg ti kampus ti University of California in Los Angeles (UCLA) kalpasan nga immatake dagiti mangsupsuporta ti Israel iti kampo nga impasdek dagiti pro-Palestinian protesters.
Babaen iti maysa a video a nagwaras iti social media a benerepikar ti Reuters, maimatangan dagiti tattao a nakaiggem ti “stick” tapno rauten ken dadaelen dagiti tabla nga agserserbi kas barikada ken salaknib dagiti agpoprotesta a Palestinian, a dadduma kadakuada ti nakaiggem ti plakard ken payong.
Inikkat dagiti otoridad dagiti kampo dagiti pro-Palestinian protesters itay kanikadua ti rabii.
Maipalagip nga immatake ti militante a grupo ti Hamas idi Oktubre a siete iti abagatan nga Israel manipud iti Gaza Strip ken dagos met nga immatake wenno nangipatungpal ti counter attack ti Israel a rason ti panangrugi ti kadakkelan a US student activism manipod idi nangrugi ti anti-racism protests idi tawen 2020.
Bayat ti panagsaknap ti rally dagiti studiante iti nagduduma a pagadalan ti Estados Unidos kas panangipeksada ti panagtubngar iti Israel ken panagserra ti Gaza, dagos a naayaban dagiti kameng ti polis a mangpasardeng wenno mangikkat kadagiti agproprotesta.
Agarup 1,200 a tattao idiay abagatan nga Israel ti napapatay idi Oktubre 7 a panag-atake ngem 35,000 a Palestinians ti napapatay iti pangipatungpal a “retaliatory assault” ti Israel.
Idi Abril 30, impeksa dagiti opisiales ti nasao a pagadalan nga iligal ti panagkampo ken nilabsingda ti pagalagadan ken polisiya ti pagadalan.
Sigun kenni Los Angeles Councilwoman Katy Yaroslavsky, karbengan dagiti agprotesta ti “free speech” ngem ti nasapamak a sitwasion iti pagadalan ket saanen a makontrol ken natalged.
“Everyone has a right to free speech and protest, but the situation on UCLA’s campus is out of control and is no longer safe.” kinunana
