Dumanon iti agarup P767 million ti danyos ti El Niño phenomenon iti sektor ti agrikultura iti rehiyon Cordillera kas maibasar iti kaudian a datos ti Department of Agriculture – Cordillera.
Iti panakiuman ti Bombo Radyo kenni Lito Mocati, focal person ti Disaster Risk Reduction Management (DRRM) iti Department of Agriculture-Cordillera, dagiti kangrunaan a produkto a naapektaran iti rehiyon ket dagiti mais, pagay, ken high value crops.
Sigun kenni Mocati, ti danyos ti El Niño iti produksyon ti mais ket dumanon iti 2,326 nga ektarya; 8,782 nga ektarya iti pagay, ken high value crops nga agarup 39 nga ektarya.
No maipapan iti produksyon, kinuna ni Mocati a dumanon iti pakabuklan a 40,712 metric tons ti naapektaran no sadino 36,864 metric tons ti naapektaran iti mais; 3,653 metric tons iti pagay ken 194 metric tons kadagiti high value products.
Para iti total value, ti danyos iti mais ket dumanon iti agarup P638 million ken iti pagay nga agarup P127 million.
Dagiti kangrunaan met a probinsiya a naapektaran ti produksyon ti mais ket ti probinsya ti Ifugao partikular iti Alfonso Lista ken Aguinaldo.
Kabayatanna, nangipaay met iti tulong ti Department of Agriculture iti tulong kadagiti naapektaran iti tikag babaen ti panangiwarasda iti irrigation hose, pump and engine sets, solar powered irrigation system, water pump ken daduma pay.
Impeksa met ni Mocati nga umadanin ti paniempo ti La Niña gapu iti dayta nasken nga agdalus dagiti mannalon kadagiti talon dagitoy tapno mayat ti drainageda.//Bombo Mera Pacpacan
