BAGUIO CITY – Dumanonen iti nasurok Php444.7-million ti danyos iti sektor ti agrikultura iti rehion Cordillera gapu iti mapaspasaran nga epekto ti El Nino phenomenon iti agdama a tawen.
Iti interview ti Bombo Radyo kenni Crisante Rosario, Disaster Risk Reducton and Management Focal iti Department of Agriculture – Regional Field Office – Cordillera, agdagup iti 7,800 ti bilang dagiti mannalon a naapektaran ken nalugi gapu iti panakadadael dagiti mula dagitoy.
Maibasar iti kaudian a datos ti nasao nga ahensya idi March 22, ti probinsya ti Ifugao ti kangrunaan a naapektaran nu sadino dumanon iti Php232-million ti danyos.
Sarunwen ti Mountain Province nga addaan ti Php160.51-million a danyos; PhpP51.14 milyon iti probinsya ti Kalinga; P591,880 sadiay Abra; bayat a P323,910 iti probinsya ti Benguet.
Sigun kenni Rosario, dagiti mula a mais ti nakaro a naapektaran nu sadino dumanon iti Php411-million ti production loss.
Malaksid iti dayta, dumanon met iti 63 ti bilang dagiti mangngalap a naapektaran iti nasao a weather phenomenon nu sadino nakailista dagitoy ti 1,470 a kilo ti production loss kadagiti ikan a mapatta-patta nga aggatad ti Php226,090.
Dumanon met iti 26,000 metric tons ti production loss iti sibubukel a rehion.
Gapu iti dayta, makidkiddaw ti kanayonan a suporta manipod kadagiti local government units kagiddan ti panangiproseso ti nasao nga ahensya iti tulong a maipaay kadagiti naapektaran a mannalon.
Mainaig iti dayta, manarimaan metten ti panangipatungpal ti National Irrigation Administration iti rotational water delivery ken distribution tapno maipaayan ti umdas a danum dagiti plantasyon iti Cordillera kagiddan paylaeng ti agtultuloy a panagbaba ti lebel ti danum iti river main stream.
Adda metten ti nakasagana a bin-i a maipaay kadagiti mannalon nangruna kadagiti vulnerable areas.
Kabayatanna, mangipatpatungpal met ti nasao nga ahensya ti monitoring kadagiti merkado tapno mamonitor ti presyo dagiti produkto agrikultura.//Bombo Marinel Rodrigo/Bombo Rob Dominguez
