Nangipila ti resolusion ni Davao City Representative Paolo Duterte a mang-imbestigar iti maatap nga extrajudicial killings iti pagilian iti las-od iti dua pulo ket lima a tawen
Impila ni Duterte ti singasing babaen iti House Resolution 1745 idi Mayo 22 kalpasan a rinugyan ti Committee on Human Rights ti imbestigasyon kadagiti napapatay nga adda pakainaiganna iti police anti-drug operations bayat ti termino ti amana a ni sigud a President Rodrigo Duterte.
Inlawlawagna a rumbeng a maadal ken matingiting ti kasasaad iti likudan ti rumangrang-ay nga “extrajudicial killings “ iti pagilian.
Indagdagna a rumbeng a maki-cooperate wenno makitinnulong ti Commission on Human Rights (CHR), Department of the Interior and Local Government (DILG), ken ti Philippine National Police (PNP) gaputa dagitoy iti makin-ammo kadagiti napapateg a datos ti “extrajudicial killings” ken dadduma pay a “human rights violations.”
Maipalagip a ni sigud a President Duterte ken dagiti nangangato nga opisial bayat ti adminstrasionna ket maim-imbestigaran babaen iti International Criminal Court (ICC) nga adda pakainaiganna iti mapapati a pannakaaramid ti krimen kontra iti pannakatay dagiti indibidual gapu iti droga bayat ti panagtakemna.
