Inyebkas ni David D’Angelo a kameng ti grupo a Bunyog Pagkakaisa a saan koma nga usaren ni Senate President Francis “Chiz” Escudero ti impeachment court kas “bargaining process” tapno mapanaganan kas sumaruno a Bise Presidente iti Pilipinas.
Sigun iti nasao nga opisial, nagtignay koman dagiti maseknan nga opisial iti impeachment ni Vice President Sara Duterte iti uneg ti 24 nga oras kalpasan a naawat daytoy iti Senado gapu iti 1987 Constitution a mangibagbaga a dagiti impeachment ket rumbeng a maproseso “dagus.”
Innayonna a ti impeachment court ti kakaisuna a wagas tapno mapaneknekan ni Vice President Duterte ti kinainosente, gaputa saan a maidarum iti aniaman a sabali a korte bayat ti kaadda daytoy.
Kinuna pay ti nasao nga opisial a saan kuma nga aramaten ni Senador Escudero ti Senado wenno ti impeachment court para iti “bargaining process” iti bukodna a bagi tapno agtugaw iti kanito a mabakantean ti posision.
Kasaruno ti kinuna ni Senador Escudero a naituding inton bulan ti Oktubre iti agdama a tawen ti impeachment trial ni Vice President Duterte.
Kabayatanna, impaakamo ni Senador Escudero a saan nga interesado nga agbalin a Bise Presidente iti kanito a mapapanaw iti puesto ni Vice President Sara Duterte.
