BAGUIO CITY – Impetteng ti lokal a gobyerno ti Baguio ti panagsurot dagiti residente ken dagiti adda ita ditoy siudad kadagiti protocols iti naideklara nga Enhanced Community Quarantine iti entero a Luzon.
Sigun kenni Mayor Benjamin Magalong, kasapulan ti disiplina ken panakitinnulong ita gaputa ti maipampangruna ket ti salun-at, kinatalged ken pakabuklan a pagsayaatan dagiti umili ti siudad.
Idi agsapa ket sinitar a mismo ti mayor dagiti parapubliko a jeep ken taxi a nagbiahe iti baet ti pammilin a saanen nga agbiahe dagiti parapubliko a luglugan ken imbilinna ti dagus a panaggarahe dagitoy.
Imballaagna pay ti panakakemmeg dagiti indibidual a saan nga agtungpal kadagiti maipatpatungpal a pagalagadan.
Kabayatanna, iti met interview ti Bombo Radyo kenni City Administrator Engr. Bonifacio dela Peña, kinunana a siyam itan ti checkpoints a paturong iti siudad ken kangrunaan a tuttutukanda dagiti pribado a lugan a sumang-at wenno sumrek ditoy lokalidad.
Inlawlawagna a daytoy ket gaputa saanda a kayat nga adda ti makastrek ditoy siudad nga indibidual a kontaminado iti coronavirus.
Impettengna a no awan ti napateg nga aramiden ditoy dagiti sumrek nga indibidual ket kiddawenda ti panagsubli dagitoy iti nagtaudanda a lugar.
Mapalubusan met a sumrek ditoy dagiti taga-Baguio no mapaneknekanda a taga-Baguio dagitoy ken addaanda iti kaskenan a sertipikasyon.