BAGUIO CITY – Nagsikig ti maysa a bus ti Development Bank of the Philippines a naglaon iti 41 nga empleyado ti nasao a bangko sadiay Badiwan, Poblacion, Tuba, Benguet itay laeng pasado alas onse ti agsapa.
Sigun kenni PCI Jim Helario, dadaulo ti Tuba PMP, ti nasao a bus ket DBP Hino Bus nga addaan plaka nga SAA 2946 nga imanmaneho ni Jhonson Bitao Binabay, 48 anyos, naasawaan ken residente ti Bagong Silang, Caloocan.
Kinunana a pasalog sadiay lowland ti nasao a bus manipud sadiay Mines View, Baguio City ken nakalugan ditoy dagiti nasao nga empleyado ti bangko a nakipaset iti maysa a seminar.
Naamuan a loose break nga addaan mechanical defect ti rason ti nasao nga aksidente.
Iti agdama ket sumagmamano a nadangran a pasahero ti naitaray iti Baguio General Hospital and Medical Center para iti panakataming dagitoy.
Dinakamat pay ni PCI Helario a ti nakapasamakan ti insidente ket siguden a pakapaspasamakan dagiti aksidente sadiay no sadino, idi laeng napalabas a tawen ket tallo ti pimmusay iti aksidente a napasamak sadiay a nakairamanan ti maysa a truck.
