BAGUIO CITY – Nagpason ti deadline a March 31, 2021 para iti panagaplikar dagiti transport groups ditoy rehion Cordillera para iti panagbalinda a kooperatiba wenno korporasyon a maitunos iti Public Utility Vehicle Modernization Program.
Sigun kenni Land Transportation Franchising and Regulatory Board (LTFRB) – Cordillera Regional Director Engr. Lalaine Sobremonte, dumanon iti 52 a legal entities ti nagaplikar para iti consolidation.
Kinunana a dumanon met iti 281 a ruta ti inaplikaran dagitoy a katukad ti 3,410 nga yunit ti parapubliko a lugan, pakairamanan ti jeep ken van.
Inyunay-unayna pay a saan a makanselar wenno mailaylayon ti nasao a deadline.
Impetteng pay ni Engr. Sobremonte a nabayagen nga inwaragawagda ti nasapa a panagparehistro para iti consolidation dagiti transport groups gaputa nasken a dumalan pay dagitoy iti proseso kas iti assessment ken hearing sakbay a maaproban ti aplikasyon dagitoy.
