BAGUIO CITY – Saan a naliklikan ti sumagmamano kadagiti kandidato iti kina-mayor ti baguio ti nangpasagid weno nagparipirip kadagiti agdama nga opisyales ti siudad seknan iti isyu ken parikut iti iligal a sugal a masansan nga irekreklamo dagiti umili.
Iti panagdebate dagitoy iti naangay a debate sa bombo idi agsapa, nagkaykaysa nga impeksa dagiti innem a mayoralty candidates ti nainget a panangtubngarda iti operasyon ti iligal a sugal ken aniaman nga iligal nga aktibidad ditoy siudad malaksid nga inkarida ti saanda a panangkanunong wenno panangipalubos iti iligal a sugal.
Kinuna ni Engr. Tony Boy Tabora a gapu iti korapsion ket adda paylaeng ti iligal a sugal iti Baguio nangruna ta adda ti maipapaay a pondo a rason tapnu maipalubos ti nasao nga aktibidad.
Iti saludsod nga agingga kaano nga agawat iti pasuksuk iti iligal a sugal, kinuna ni Atty. Ed Avila nga awan ti maseknan a kayat ti nagdamag a pakaiturongan ti saludsod.
Impetteng met ni Atty. Jose Molintas a nasken a saan a maipalubos ti iligal a sugal nangruna ti large scale gaputa daytoy ti mangdaddadael iti balanse ti eleksion ken saan a patas kadagiti kandidato.
Kinunana a dagiti agnumnumar iti iligal a sugal ket addaan kabaelan, mas ad-adu ti tarpaulin ken mas ad-adu ti bagas nga iwarwaras dagitoy.
