Pakaseknan ita ti delegasyon iti Baguio City ti panagflightda paturong idiay Puerto Princesa, Palawan para iti 2024 Batang Pinoy gapu iti panakaitantantan ti flight ti sumagmamano kadagitoy.
Sigun kenni Gaudencio Gonzalez, ti Sports and Development Officer iti Baguio City,daduma kadagiti immunan a nagturong idiay Puerto Princesa ket nakapasar iti delayed ken panagsubli iti flight dagitoy.
Iti baet dayta, impanamnama met ni Gonzalez nga ar-aramiden amin ti airline ken dagiti opisyales ti pamuspusan tapno maitulod ti delegasyon sakbay ti naituding nga ay-ayam dagitoy.
Kabayatanna, dinakamat ti opisyal nga awan unay ti nagbalin nga epekto dagiti nagsasaruno a bagyo iti panagsanay wenno panagsagana dagiti atleta ken iti agdama ket manarimaanen iti panag-acclimatize dagiti atleta a nakadanon itan idiay Palawan.
Kabayatanna, mangnamnama daytoy nga awan ti mapasaram a nakaro a panagsakit dagiti atleta bayat ti pasalip kas iti Dengue, panagsakit iti tian, ken panakapasar dagitoy iti Loose Bowel Movement(LBM).
Nupay kasta, kinunana a saan latta maliklikan dagiti kaso iti panaggurigor wenno panaguyek dagiti atleta a kadawyan a sagsagrapinda.//Bombo Rob Dominguez
