BAGUIO CITY–Pinadayawan ti lokal a gobierno ti siudad ti Baguio dagiti atleta a nakagun-od iti balitok a medalia iti kalleppas a Cordillera Administrative Region Athletic Association (CARAA)-Meet 2018 a naangay sadiay Bangued, Abra.
Binigbig ni Mayor Mauricio Domogan ti agtultuloy a pananggun-od dagiti atleta ti siudad iti kampeonato iti CARAA Meet.
Ibilbilang ti mayor kas dakkel a dayaw iti siudad ti pannakagun-od ti Team-Baguio iti pakabuklan a 222 a gold medals, 106 a silver ken 61 bronze medals.
Al-allukuyen ti mayor dagiti atleta a mangpasayaat pay iti abilidad dagitoy iti sports para kadagiti dadduma a kompetision kas iti Palarong Pambansa 2018 a maangay inton Abril sadiay Vigan City, Ilocos Sur.
Imbilin met laeng ti mayor ti napartak a panangiproseso ti DepEd kadagiti requirements dagiti atleta para iti pannakaipaay ti insentibo kadagitoy.
Maipalagip a malaksid iti kampeonato ket nagun-od met laeng ti Baguio-delegates ti Most Disciplined, Most Organized ken Cleanest and Greenest Award iti CARAA Meet 2018.
