BAGUIO CITY – Nagun-od ti rehiyon Cordillera ti kaunaan a balitok a medalya dagitoy iti Palarong pambansa 2017 idi kalman ti malem.
Sigun kenni Georaloy Palao-ay ti panakangiwat ti Department of Education (DepEd) Cordillera, nagun-od daytoy ni Eza Rai Yalong iti-Arnis Secondary Girls.
Ni Ezarai Yalong ket maysa metlaeng kadagiti atleta ti rehiyon a nakaiyawid iti balitok a medalya idi napalabas a palarong pambansa iti metlaeng ayayam nga arnis.
Kinunana nga idi kalman ket nalpasen ti paay-ayam para iti individual arnis iti elementary girls, boys ken iti secondary girls bayat a maituloy met ita nga aldaw ti ayayam ti individual boys iti secondary ken iti elementary division sakbay a maituloy ti arnis anyo.
Mainaiag iti daytoy, makabalubal metlaeng ita nga aldaw para iti gymnastics da John Mark Ganado ken Jericho Soliven para iti finals ti elementary gymnastics.
Kabayatanna, naipaayan iti window hour wenno iskwedyul ti panagay-ayam dagiti atleta ti rehiyon Cordillera tapnu maliklikan a matalimudaw dagitoy iti panagay-ayamda kabayatan ti napudut a panawen sadiay probinsya ti Antique para iti Palarong Pambansa 2017.
Segun kenni DepEd-Baguio Sports Coordinator Fernando Eleponga, agay-ayam dagiti atleta ti rehiyon a mangrugi iti oras ti alas-nueve ti agsapa agingga alas tres ti malem.
Impanamnamana met nga iti agdama ket addan iti natalged a kasasaad dagiti atleta a natalimudaw kabayatan ti opening ti nasao nga aktibidad.
