BAGUIO CITY – Napadayawan ti delegasyon ti siudad ti Baguio a nakipaset ken nangabak iti 2018 Philippine National Games a naangay sadiay Cebu idi napalabas a bulan ti Mayo.
Sigun kenni City Sports Development Officer Gaudencio Gonzales, nagun-od ti Team Baguio ti maikadua a pwesto kalpasan a nakagun-odda iti 39 gold medals, 37 silver medals ken 58 bronze medals.
Kinunana a nangipatulod ti siudad iti 210 nga atleta ken sports officials iti makalawas a torneyo a pinasetan ti nasurok 3,000 nga atleta iti entero a pagilian.
Innayonna a manarimaan ti panangiproseso ti Department of Budget and Management iti premyo a maipaay kadagiti lokal a gobyerno dagiti delegasyon a nakastrek iti Top 10.
Dinakamatna pay a makaawat ti siudad ti Baguio iti P8-M nga sporting assistance gaputa impangato ni Presidente Rodrigo Duterte ti sigud a gatad a maipapaay kadagiti lokal a gobyerno dagiti delegasyon a nakastrek iti Top 5.
