BAGUIO CITY – Manamnama a mangipaulog iti resolusyon ti Regional Tripartite Wage and Productivity Board (RTWPB) – Cordillera ita a bulan wenno iton sumaruno a bulan mainaig iti minumun wage increase ditoy rehiyon.
Segun kenni RTWPB-Cordillera Board Secretary Augusto Aquillio, mangipatungpal dagitoy iti deliberasyon tapnu mapagtongtonganda ti gatad a mainayon iti minimum wage ditoy rehiyon.
Kinunana a babaen iti daytoy ket maadal pay a naimbag ti pannakaipangato ti sweldo ditoy rehiyon ken para metlaeng iti dagus a panakaaprobar daytoy.
Immunan a napagnunumuanda dagiti rason tapnu manayunan ti suweldo dagiti mangmangged ditoy rehiyon isut gapuna a kalpasan ti maangay a deliberasyon ket dagus a maipatulod ti nasao a resolusyon iti Central Office.
Innayona pay a ti inisyal a timeline dagitoy ket iti bulan ti Mayo a maiyimplemetar ti wage increase iti kanito a maaprobaran daytoy.
