Dumanonen iti nasurok 300 ti bilang ti nailista a kaso iti Dengue iti Baguio City sipud Enero ita a tawen aginnga idi May 21.
Iti panakiuman iti Bombo Radyo kenni Dr. Celia Flor Brillantes,dadaulo iti City Health Services Office-Baguio, ti nadakamat a bilang ket tallo a porciento a nangatngato ngem iti nailista a kaso iti kapada a period idi napan a tawen.
Innayon ni Dr. Brillantes a tallo met nga indibidwal iti pimmusay gapu iti nasao a sakit pakairamanan iti dua nga adults idi Enero ken maysa nga agtawen iti siam idi Pebrero.
Agtaltalinaed met a dagiti babbarangay iti Baguio City a nakailista iti kaadwan a kaso iti Dengue idi napan a tawen ti naobserbaran a pagtataudan metlaeng dagiti pasyente ita a 2025.
Sigun iti opisyal, mabalin a daytoy ket adda iti pakainaiganna iti populasyon, basura a mapapataud, ken dagiti lugar a mabalin a pagumukan wenno breeding sites dagiti lamok nga addan iti Dengue Virus.//Bombo Rob Dominguez
