Inlawlawag ni Elmer Mendoza, spokesperson ti Department of Transportation-Cordillera(DOTr-CAR) a saan a napatgan ti aplikasyon ti Mines View Gibraltar Transport Cooperative (MVGTC) iti jeepney consolidation gapu ta naartapanen ti nasao a kooperatiba ti 60% a consolidation rate.
Imbinglay ni Mendoza a maibasar iti Memorandum Circular 2024-01 nga impaiyulog ti Land Transportation Franchising and Regulatory Board(LTFRB), maakseptar laeng dagiti aplikasyon nu ti agdama a consolidation iti maysa a partikular a ruta ket nababbaba ngem 60%.
Kagiddan dayta, insingasingna a makipaset laengin ti Mines View Gibraltar Transport Cooperative kadagiti naconsolidate nga operators.
Mainaig iti dayta, binabalaw ni Baguio City Councilor Benny Bomogao dagiti pagannurutan nga impaiyulog ti Land Transportation Franchising and Regulatory Board(LTFRB) seknan ti saan a panakaaprubar dagiti naipila nga aplikasyon para iti jeepney cosolidation nu sadino, kwinestyunaranna ti denial iti aplikasyon ti nadakamat a transport group.
Innayonna a ti panagoperate dagiti nagduduma a transport group iti agpada a ruta ket dakkel a katulungan para iti publiko gapu ta ad-adda a mapasayaat ti availability dagiti mabalin a maluganan.
Sigun kenni Bomogao, maysa pay a karit a sangsangwen dagiti daduma nga interesado nga agpaconsolidate ti nangina a membership fee a masingsingir manipod kadagitoy.
Nupay kasta, impetteng met ni Mendoza nga adda ti Tsuper Iskolar Program a maysa a social support system a mabalin a makatulong kadagiti drivers ken operators para iti Public Utility Vehicle Modernization Program nu sadino, tawen 2020 idi nangrugi nga agepektibo daytoy.
Innayonna a malaksid iti Tsuper Iskolar Program, adda metlaeng ti entrepreneur program nga ijidiaya ti Department of Transportation(DOTr) ken ti Department of Labor and Employment (DOLE) para kadagiti kameng ti parapubliko a transportasyon a maap-apektaran iti modernization program ti agdama nga administrasyon.
Kabayatanna, impetteng met ni Councilor Arthur Allad-iw a kayat a siguradwen ti siudad ti Baguio a maipapaayan ti kaskenan a suporta dagiti displaced wenno naapektaran nga indibidwal.
