Nangisayangkat ti Department of Environment and Natural Resources (DENR) iti environmental accounting iti Cordillera tapno maduktalan ti gatad iti kinabaknang iti rehion ken maaramat daytoy iti panagplano dagiti programa para iti panangaywan ken mapagtalinaed ti kinadur-as.
Sigun DENR Assistant Secretary Daniel Darius Nicer, napateg ti scientific study iti aglawlaw iti Cordillera tapno makabukel iti natibker a basaran iti panangaramid kadagiti polisia iti panagkonserba ken panangimanehar iti natural a kinabaknang iti aglawlaw maitunos iti Philippine Ecosystem and Natural Capital Accounting (PENCA) Act.
Kinuna metlaeng iti DENR a sukimatenda iti panagadal ti kinapateg kadagiti watershed iti Cordillera iti ekonomiya iti Northern Luzon.
Kabayatanna, impaganetget ni DENR-CAR Regional Executive Director Paquito Moreno a ti panangaywan iti bantay iti rehion ket napateg iti suplay iti danum, irigasion, ken power generation kadagiti kaaruba a rehion.