BAGUIO CITY – Pimmusay ti maysa a dental technician bayat nga agpapaagas iti ospital ti kadwana kalpasan a napalpaltugan dagitoy sadiay San Juan, Tabuk City, Kalinga itay parbangon, Setyembre 8.
Nabigbig ti pimmusay a ni Joegie Valera Cabicungan, 37-anyos bayat a ti nadangran ket ni Orland Dave Pascual a.k.a Sadam, agpada dagitoy a residente ti Bulanao Tabuk City Kalinga.
Maibasar iti inisyal a ti report ti Tabuk City Police Station, agpada nga agin-inom dagiti biktima ken ti suspek iti sangwanan ti resto bar.
Nupay kasta, timmakder ti suspek ken immasideg iti table dagiti biktima ken ditoy a pinalpaltuganna iti namin-adu a daras.
Dagus a timmaray ti suspek ken dagiti kakadwana kalpasan ti insidente ngem nakemmeg metlaeng dagitoy iti hot pursuit operation dagiti otoridad.
Maisagsagana metten ti kaso a murder ken frustrated murder kontra iti suspek bayat a maim-imbestigaran ti motibo daytoy.
