Kidkiddawen ti Department of Education (DepEd) kadagiti local government units iti intero a pagilian nga agkedked a mausar dagiti pagadalan kas “evacuation centers” ita nga umay a panawen ti panagtutudo gaputa mabalin nga agresulta daytoy iti pannakasinga ti panagadal dagiti estudiante.
Kiniddaw ni DepEd spokesperson Undersecretary Michael Poa ti nasao a pakaseknan ita nga aldaw bayat ti panagtaripnong dagitoy iti National Disaster Risk Reduction and Management Council (NDRRMC).
Sigun kenkuana, masansan nga agresulta iti pannakasinga ti panagsuro dagiti manursuro gaputa bumaybayag dagiti indibidual nga agtataeng kadagiti pagadalan.
Kinunana pay a karaman dagiti studiante a saan unay a naapektaran ti bagyo ket saan a sumrek iti pagadalan gaputa maar-aramat dagitoy kas evacuation center.
Maibasar iti revised DepEd Order 37 a pinirmaan ni Vice President and Education Secretary Sara Duterte, dagiti pagadalan ket mabalin a mausar kas evacuation site apaman nga adda dagiti bagyo a sumangbay ngem saan a ngumato iti sangapulo ket lima nga aldaw.
Kabayatanna, dagiti klase manipod kindergarten agingga Grade 12 ken dagiti mangmangged iti parapubliko a pagadalan ket dagos a makanselar apaman nga ideklara ti state weather bureau PAGASA ti Tropical Cyclone Wind Signals 1, 2 ,3, 4, wenno 5.
