Indagadag ti Department of Environment and Natural Resources (DENR) kadagiti local government units ti umno a panangibellengda kadagiti basura gaputa nabunton dagiti basura iti nagduduma a lokalidad kalpasan ti bakasion.
Iti statement ti nasao nga ahensia, kinunana nga adda ti bileg ti National Solid Waste Management Commission (NSWMC) a mangimbestigar ken mangirekomendar iti pannakaipila dagiti kaso nga administratibo wenno kriminal babaen ti Solid Waste Management Act.
Nakamandato iti Solid Waste Management Act kadagiti lokal a yunit ti gobierno a mangipatungpal kadagiti planoda a panangtarawidwid iti solid waste.
Nadakamat pay ti nasao nga ahensia a paset ti trabaho ti lokal a gobierno a salakniban ti salun-at ti publiko ken salakniban ti aglawlaw.
Kabayatanna, impakaamo ti nasao nga ahensia a mangipaayda ti technical assistance kadagiti lokal a gobierno ti Pilipinas tapno matungpalda dagiti trabaho ken obligasionda.
