Nagpakdaar ti Department of Health (DOH) a mabalin nga umadu ti breeding areas dagiti lamok nga agaw-awit iti dengue virus kalpasan ti innem nga agsasaruno a tropical cyclones a dimmalapus iti pagilian.
Iti maysa nga advisory, impalagip ti DOH iti publiko nga ikkatenda ti stagnant water ken nasapa nga agkonsultada no makariknada kadagiti sintomas ti dengue, partikular kadagiti rehion a naapektaran kadagiti tropikal a bagyo a Kristine, Leon, Marce, Nika, Ofel, ken Pepito.
Maibasar iti datos ti Department of Healt, dumanon iti 17,033 a kaso ti dengue ti nairekord manipod iti Oct. 20 agingga Nov. 2, wenno 17% a nababbaba nu idilig iti nairekord a 20,498 manipod Oktubre sais agingga Oktubre disi nueve iti agdama a tawen.
Awan metten ti panangngato a nailista iti baro a kaso ti dengue iti nagduduma a rehion iti napalabas nga innem a lawas.
Kabayatanna, gagangay kadagiti pagilian nga addaan iti tropikal a klima a kas iti Pilipinas, ti dengue ket gapu iti virus nga inyakar dagiti lamok.
Kaaduan a kaso ti dengue ket asymptomatic.
Dagiti sintomas daytoy ket pakairamanan ti nangato a gurigor a dumandanon ti kapudotna iti 40 C, nakaro a panagsakit ti ulo, muscle ken joint pain, panagulaw, ken panagruar ti rash.
Malaksid iti dayta,makarikna pay ti ut-ot iti likudan dagiti mata, panagsarua, ken “swollen glands,” sigun iti Department of Health.
Mangrugi ti sintomas manipod iti uppat agingga sangapulo nga aldaw kalpasan ti panagkagat ti lamok ken agbayag daytoy manipod dua agingga pito nga aldaw.
Kadawyan a mapukpukaw ti sintomas iti maysa agigga dua a lawas.
Nupay kasta, dadduma a tattao ti maaddaan iti nakaro a dengue a kasapulan ti pannakaagas iti ospital.
