Pinaglibakan ti Department of Migrant Workers (DMW) ti kinuna ni sigud nga Overseas Workers Welfare Administration (OWWA) chief Arnell Ignacio a nagdalan ti P1.4-billion land acquisition deal iti umno ken ligal a proseso.
Kinuna ni Migrant Workers Secretary Hans Cacdac, agraman ti dadduma pay nga opisial ti DMW, nga interamente a na-bypass ti panangaprobar iti nasao a banag manipod kadagiti OWWA Board of Trustees.
Sigun kenni Cacdac, iti sidong ti linteg, aniaman a transaksion ken panagbalbaliw a pakairamanan dagiti sanikua ti OWWA ket masapul a maiparang ken aprobaran ti Board of Trustees—a pakairamanan dagiti pannakabagi ti DMW.
Nupay kasta, saan a pulos a naipakaammo iti board ti desision a gumatang iti sanikua ken mangbalbaliw kadagiti kangrunaan a probision iti Deed of Absolute Sale.
Itay laeng nabiit, indepensa ni Ignacio ti addangna babaen ti panangikalinteganna nga amin a transaksion ket naipadamag iti board of trustees ken ti sanikua ket umno a nasukimat babaen iti Land Bank of the Philippines—ti naidesignar a government financial institution.
Iti tengga ti agtultuloy nga imbestigasion, agtaltalinaed latta ti takder ti DMW iti full transparency ken panagtulnog iti pagannurutan iti amin a transaksion nga adda pakainaiganna iti public funds.
