Nagballaag ti Department of Trade and Industry (DTI)-Cordillera iti publiko a nasken a kitaenda a nalaing dagiti school supplies a gatgatangenda ken nu maitunos daytoy iti price guide a nairuar.
Daytoy ket kagiddan ti umadanin nga iseserrek dagiti estudyante nu sadino tunggal maysa ket manamnama gumatang kadagiti pagkasapulanda iti pagadalan.
Gapu iti dayta, tunggal lawas a mangipatpatungpal ti Department of Trade and Industry (DTI)-Cordillera iti monitoring kadagiti lako dagiti nagduduma nga establishemento nga school supplies tapno masigurado a masursurot dagiti price guide.
Sigun kenni Jeremias Agpes, dadaulo ti Consumer Protection Division ti Department of Trade and Industry (DTI)-Cordillera nga umno dagiti presyo a maipatpataw kadagiti school supplies.
Maibasar iti kaudian a price guide nga inruar ti ti Department of Trade and Industry (DTI)-Cordillera iti bulan ti Hunyo, ti notebook ket addaan iti presyo nga P11.80 agingga P52, ti papel ket P9.50 agingga P61, ballpen a P3 agingga P33, lapis nga P11 agingga P33, crayons a P12 agingga P114, eraser a P4.50 agingga P20, ken sharpener a P15 agingga P69.
Nu pay kasta, dagiti presyo dagiti school supplies ket nakadende iti brand ken kaado dagitoy.
Kabayatanna, inyunay-unay ti Department of Trade and Industry (DTI)-Cordillera a nu adda pakaseknan ti publiko ket saanda nga agdua-duaa nga agbisita iti opisina dagitoy gapu ta kanayun a nakasaganada a mangrisut kadagiti reklamo dagitoy.
