Pinalagipan ti Department of Education (DepEd) dagiti nagannak nangruna dagiti mangipapaay ti nagarbo a regalo kadagiti agturpos nga annakda nga agbalinda a sensitibo ken ikonsiderada ti karirikna dagiti dadduma.
Kasaruno daytoy ti maipabpablaak iti social media a panangipaay dagiti dadduma a nagannak ti nagkakapintas a garlands ken nagdadakkel a gatad ti money bouquet.
Sigun iti nasao nga ahensiya, desisyon dagiti nagannak nu anya ti iregaloda kadagiti annakda kas pammadayaw gapu iti panagturposda.
Nupay kasta, impeksa ti opisyal a posible nga adda dagiti masaktan nga indibidual partikular dagiti awan ti maipaayna a regalo ken dagiti awan ti maawatna a regalo nangruna nu dagitoy ket agsagsagaba ti krisis iti pinansiyal.
Sigun met kadagiti dadduma a netizens, saan a dakkes nga ipaayan ti regalo dagiti agturpos nga annakna nangruna ta nagrigat dagitoy.
Nupay kasta, impettengda a mabalin a maipatungpal daytoy kalpasan ti graduation gapu ta adda dagiti dadduma a mangipapaay ti regalo uray saan pay a nalpas ti graduation ceremony.
