BAGUIO CITY – Maisagsaganan ti depensa dagiti dua a traffic enforcers ti Baguio City nga impa-subpoena ti maysa a judge sadiay Cabanatuan City gapu iti panangbaklasda iti plaka ti lugan daytoy bayat a nakaparada ditoy siudad.
Naibilin iti subpoena order nga addaan date nga October 28 ti panagparang ni Bernard Batnag a miembro ti Public Order and Safety Division ti Baguio ken ti traffic enforcement chief a nakadestino iti Baguio City Public Market iti sala ni Municipal Court Judge Nelson V. Lago ti Cabanatuan City inton November 29.
Pagpalpalawagen ni Judge Lago dagiti dua no apay a saan dagitoy a ma-cite ti indirect contempt.
Nailanad iti subpoena order a binaklas ni Batnag ken dagiti traffic enforcers ti plaka ti lugan ni Judge Lago a nakaparada iti asideg ti jeepney terminal sadiay Kayang Street idi October 25 ken maibasar iti reklamo ti nasao nga ukom ket panaglabsing daytoy iti due process.
Naamuan a dimmar-ay ti ukom iti maysa a security seminar ditoy Baguio ken apagbiit nga imparadana ti luganna iti nasoa a disso sakbay nga agawid kuma sadiay Cabanatuan.
Impetteng ti subpoena order ni Lago a gapu iti panangiprosesona iti multana ken iti panangsublina iti plaka ti luganna ket nasinga dagiti scheduled hearings daytoy.
Innayonna a ti due process ket maysa a basic right a nailanad iti konstitusyon a mabalin a maiyaplikar kadagiti kaso ti panagkumpiskar iti plaka.
Iti met interview ti Bombo Radyo kenni PCol. Allen Rae Co, director ti Baguio City Police Office, kinunana nga isagsaganan ti legal team ti lokal a gobyerno ken ti pulisya ti panangidepensada iti nagbalin nga aksiyon dagiti nasao a traffic enforcers.
Impettengna nga inaramid laeng dagiti traffic enforcers ti responsibilidad dagitoy a panangipatungpal kadagiti ordinansa iti trapiko ken panagparada ditoy Baguio.
Kinunana a saan nga ammo dagiti traffic enforcers nga ukom ti agtagikua iti lugan a binaklasan dagitoy.
Nupay kasta, impetteng ni Co nga uray pay ammoda nga ukom wenno obinaklasan ng plaka pisyal ti gobyerno ti agtagikua kadagiti lugan a naglabsing iti linteg ket baklasenda latta ti plaka dagitoy kas maibasar iti traffic rules and regulations.
Innayonna a ti nasao nga aksiyon ni Judge Lago ket panangpuntirya iti panakaipatungpal ti anti-road obstruction order ti Baguio City.
Dinakamatna pay a ti pannusa iti panaglabsing iti iligal a panagparada ditoy siudad ket panagbaklas iti plaka ken panangipaay iti citation ticket nga agserbi kas resibo no apan sakaen ti plaka.
