BAGUIO CITY – Maur-uray paylaeng ti pammalubos wenno direktiba manipud iti Department of Transportation (DOTr) – Cordillera para iti panakaituloy ti operasyon dagiti parapasahero a bus iti Baguio kagiddan ti panakailukat ti sektor ti turismo ti siudad.
Sigun kenni Atty. Althea Alberto, executive assistant iti City Mayor’s Office, agtultuloy latta nga ad-adalen ti Baguio Traffic and Transportation Technical Working Group ti nasao a banag.
Kinunana a saan pay a nagkiddaw ti LGU iti special permit para iti operasyon dagiti parapubliko a transportasyon kas kadagiti bus para iti sektor ti turismo.
Immunan a kinuna ni LTO-Cordillera regional director Francis Ray Almora nga agtaud a mismo iti LGU ti kiddaw para iti special permit ti operasyon dagiti parapasahero a bus.
Dinakamat pay ni Atty. Alberto nga agingga ita ket ur-urayenda dagiti pagaladagan nga ipaulog dagiti bus operators iti kanito a maituloy manen ti operasyonda nga immunan a kiniddaw ti LGU kadakuada idi napalpalabas a bulan.
