BAGUIO CITY – Ur-urayen ti DPWH-Cordillera ti desisyon ni DPWH Secretary Mark Villar seknan iti maysa a district engineer iti probinsia ti Benguet a karaman kadagiti innaganan ni Presidente Rodrigo Duterte a nakaawat ti kickback kadagiti proyekto ti gobyerno.
Nailanad iti official statement ni DPWH-Cordillera Regional Director Engr. Khadaffy Tanggol nga awan pay ti naawatda a pammilin manipud kenni Sec. Villar iti sumaruno nga addang dagitoy.
Kinunana nga urayenda no ibilin ni Sec. Villar ti panagaramid ni Benguet 2nd District Engineering Office, District Engineer Romelda Bangasan wenno saan ket diretso daytoy nga agreport kenni Sec. Villar.
Naamuan met kenkuana a nagretiron iti serbisyo ni sigud a Benguet 1st District Engineering Office, District Engineer Ireneo Gallato a nairaman iti inwaragawag ni Pres. Duterte.
Immuna iti daytoy, nairaman da Gallato ken Bangasan kadagiti inwaragawag ti presidente nga addaan koneksion iti korapsion kadagiti proyekto ti gobyerno.
