BAGUIO CITY–Ur-urayen laeng ti Department of Interior and Local Government Cordillera (DILG-CAR) ti desisyon wenno pammilin manipod iti kangatuan nga opisina ti Commision on Election mainaig kadagiti Barangay Officials a saan pay a nakatugaw iti posisyon.
Maipalagip nga adda pay iti 3 nga SK Chairman ken 30 nga SK Kagawad a saan pay a nakatugaw iti posisyon gapu paylaeng iti panakapaayda a nangisumitir iti Statement of Contributions and Expenditures (SOCE) dagitoy.
Iti panakiyuman ti Bombo Radyo kenni Evelyn Trinidad, Regional Director ti DILG-CAR, kinunana nainget a sursurutenda ti pammilin a saan pay a mabalin nga agsapata ken agtugaw iti posisyon dagiti nasao nga opisyal agingga saanda a mangisumitir iti certificate of compliance ti SOCE dagitoy.
Nupay kasta, mangnamnama daytoy nga iti bulan ti Oktubre ket maawatdan ti pammilin manipod iti kangatuan nga opisina ti COMELEC tapnu marisoten ti parikotda kadagiti Barangay Officials a saan pay a nakatugaw iti posisyon agingga iti agdama.
