BAGUIO CITY – Maur-uray paylaeng agingga ita ti resulta wenno desisyon ti korte seknan iti ruling reorganization ti committee chairmanship nga impila ti pito a konsehal ti siudad.
Sigun kenni Councilor Isabelo “Popo” Cosalan, posible a mapagsaritaanda manen daytoy iti city council kagiddan ti session wenno taripnong dagitoy.
Dinakamatna a napasamak daytoy iti umuna a gundaway gapu ta ita laeng a maadaan ti city council ti sangapulo ket lima a councilor.
Inlawlawagna a mano a tawen a nabakantean ti Indigenous Peoples mandatory representative rason a saanda a narigatan iti ruling kadagiti napalpalabas a tawen.
Impettengna a sangapulo ket pito ti bilang dagitoy idi napalpalabas a tawen nu sadino saan a marigatan iti desisyon gapu ta walo laeng iti majority ruling.
Maibasar pay iti formula ket total of councilors ken maipagudwa ken agnayon ti maysa rason a walo ti majority vote a masurot iti ruling idi napalpalabas.
Nupay kasta, sipud idi nanayonan daytoy, nagbalin nga 8.5 iti kagedwa ti kinse rason a kasapulan a mairound off to 9.
Maipalagip nga immunan nga imbabawi ti bise-mayor ti desisyonna a mapagbalin mga 8.5 ti ruling nu sadino umanay ti 8, rason nga impila ti pito a konsehal ti kaso iti korte tapno maaamuan nu anya iti umno a masurot.
Inlawlawag pay ni Councilor Popo a napateg iti panakabalbaliw ti committee ti tunggal konsehal gapu ta adu dagiti naawatda a reklamo manipud iti umili ti siudad nga adda dagiti saan nga agperperform a konsehal rason a nairekomendar ti reorganization iti committees.//Raz Pagoli
