Impablaak ti Department of Information and Communications Technology (DICT) ita nga aldaw nga adda dagiti kompania ti China nga agpampammarang nga American wenno European enterprises ti mapapati a mangrekrekrut kadagiti aktibo ken sigud a kameng ti militar ti Pilipinas.
Sigun kenni Department of Information and Communications Technology Undersecretary for Cybersecurity and Upskilling Jeffrey Ian Dy, puntirya ti kompania dagiti Pilipino a mangipapay ti part-time jobs kas maysa nga analysts online.
Agpampammarang dagitoy a nagtaud idiay Western countries.
Ginasgasut a dolyar tunggal oras ti idatdatonda (offer) a panggedan kadagiti Pilipino.
Immuna a namonitor ti nasao nga ahensia ti online recruitment dagiti kompania idi laeng Disiembre idi napalabas a tawen.
Gapu iti dayta, dagos nga impadamag ti DICT ti impormasion iti Department of National Defense ken intelligence sector ti nasao a banag.
Nagballaag met ni Dy nga agannad ti publiko nangruna dagiti military personnel wenno sigud a military personnel ta amangan a maalilaw dagitoy iti idatdaton dagiti kompania ti Chinese.