Dinosdosena a deboto a Katoliko ti nagna a saan a nakasapatos ken nangaramid iti “self-flagellations” idiay Metro Manila ita nga aldaw wenno ti Maundy Thursday, kas panangipakitada iti nalabes a debosion kenni Hesu Kristo bayat ti Holy Week.
Nagna dagiti deboto a saka-saka ken sinaplitda ti bukotda babaen ti panangusar kadagiti “bamboo sticks” iti tengnga ti nabara a panawen iti adu nga oras kas pagilasinan ti panagbabawida kadagiti basolda.
Dadduma ti nangawit kadagiti nadagsen a kayo a krus iti likudan bayat nga idurduron dagiti padada a deboto iti panangipabuya manen iti panagsagaba ni Jesu-Kristo.
Adu a deboto a Pilipino ti agaramid iti narelihiosuan a panagpenitensia iti agdama a lawas sakbay ti Easter Sunday kas maysa a kita ti panagdayaw ken panagpakaasi.
Patien ti dadduma a ti panangaramid iti panangsapsaplit iti bagi ket mabalin a mangdalus kadagiti basol, mangagas iti sakit ken mangted pay ketdi kadagiti tarigagay.
Iti baet ti panangkontra ti simbaan, agtultuloy latta dagiti nadakamat nga aramid kadagiti Pilipino.
Itay laeng kanikadua, impalagip ti Department of Health kadagiti flagellants nga usarenda laeng dagiti “sanitized items” tapno maliklikan ti impeksion ken bugguan a naimbag dagiti sugatda iti sabon ken danum.
