BAGUIO CITY – Nakasaganan a maiserbi ti discharge orders dagiti amin a kadete a responsable iti panagmaltrato a nagresulta iti ipupusay daydi Cadet 4th Class Darwin Dormitorio ti Cagayan de Oro City.
Nupay kasta, kinuna ni Armed Forces of the Philippines Chief of Staff Lt. Gen. Noel Clement nnga ur-urayenda laengen ti approval wenno kumpirmasyon manipud iti opisina ni Presidente Rodrigo Duterte sakbay ti opisyal a panangiserbida iti nasao a discharge orders.
Kinunana a daytoy ket gaputa dagiti kadete ti Philippine Military Academy (PMA) ket dinutukan ni Presidente Duterte.
Maipalagip nga inwaragawagen ti Baguio City Police Office dagiti nagan dagiti pito a suspek iti ipupusay ni Cadet Dormitorio.
Nabigbig dagitoy a da Cadet 3rd Class Felix Lumbag Jr., Cadets 3rd Class Shalimar Imperial, Cadet 1st Class Axl Rey Sanopao, Cadet 3rd Class John Vincent Manalo, Cadet 2nd Class Christian Zacarias, Cadet 3rd Class Rey David John Volante ken Cadet 3rd Class Julius Carlo Tadena.
Immunan a kinuna ni resigned PMA superintendent Lt. Gen. Ronnie Evangelista a naibilinen ti separation from military service dagiti kadete a da Imperial, Lumbag ken Sanupao.
Iti agdama, agtaltalinaed iti stockade ti PMA dagiti nasao a kadete agingga nga awan ti pammilin manipud iti piskalya para iti panakaiturong wenno panakaiyakarda iti Baguio City Jail.
