BAGUIO CITY – Ipalpalagip manen ti City Environment and Parks Management Office (CEPMO) ti panagbalin a disiplinado dagiti agturturong kadagiti parke iti siudad ti Baguio.
Sigun kenni Cordelia Lacsamana, dadaulo ti CEPMO, masapul a mapagtalinaed ti kinadalus ken kinapintas ti aglawlaw dagiti parke.
Kinunana a napintas ken naranraniag ita ti pakabuklan dagiti parke iti siudad kagiddan ti panakarambak ti Panagbenga.
Innayonna nga ado dagiti naimula a masetas kadagiti parke nangruna iti nalatak a Burnham Park a kangrunaan a pagturturungan dagiti turista.
Gapu iti daytoy, kinunana a nasken a paturayen dagiti turista ken dagiti umili nga agturturong kadagiti parke ti disiplina dagitoy nangruna iti umno a panagbasura.
Kabayatanna, impasiguradona a nainget a bantayanda ti operasyon ti market encounter ken ti Baguio Blooms tapnu saan a madadael dagiti kayo iti deppar ti Lake Drive ken tapnu mainamnama a kanayon a nadalos ti aglawlaw sadiay.
