Inyunay-unay ni Mr. Baguio Body Building Champion 2024 Reynold Domalsin a napateg ti disiplina ken consistency iti tay-ak iti body building.
Iti panakiuman ti Bombo Radyo kenkuana, kinunana a ti bagina ti kalabanna tunggal agsagana daytoy para iti panakisalipna nu sadino, kanayon a puntiryana nga artapan dagiti napalabas nga improvement iti physique daytoy.
Sigun kenni Domalsin, ad-adda ti panagannad daytoy iti agdama gapu iti edadna nu sadino, kinunana a nalaklaka a maapektaran wenno agsagrap iti dunor dagiti natataenganen kas kenkuana.
Kagiddan dayta, guyguyuguyenna dagiti kapadana a natataengan nangruna dagiti agtawinen iti limapulo(50) wenno innem a pulo(60) nga agbalin dagitoy nga aktibo nga agensayo ken mangigaraw kadagiti muscle ken bagida.
Iti sabali a bangir, imbinglay ni Domalsin a maysa kadagiti pundasyon iti panagballigina iti nasao nga ay-ayam ti suporta ti asawa daytoy nga addaan metlaeng iti kapada nga interes gapu ta maysa daytoy kadagiti makaaw-awat iti bennegna nangruna nu panawen ti panagensayona.
Innayon ni Domalsin a saanna a kiniddaw iti anakna a suruten daytoy ti kapada a karera.
Nupay kasta,naragsak nga imbinglay ti nasao a body builder nga addaan metlaeng iti kapada nga interes ti anak daytoy.
Kabayatanna, awan pay ti makitkita ni Domalsin kadagiti sansanayen daytoy nga addaan iti kapadana ti mindset iti nasao a karera nu sadino, kaadwan kadagiti as-asistaranna ket para laeng iti maintainance iti kasasaad iti pammagi dagitoy.//Bombo Rob Dominguez
