Inruar ti Presidential Anti-Organized Crime Commission (PAOCC) ita nga aldaw ti maysa a ladawan a naala iti Kuala Lumpur International Airport idi Hulyo 21.
Dua a babai ti adda iti nasao a ladawan nu sadino maysa ditoy ket ni dismissed Bamban, Tarlac Mayor Alice Guo a nakasuot iti nangisit a bado, naka-sunglasses ken addaan iti sumagmamamno a bag.
Sigun kenni PAOCC Undersecretary Gilbert Cruz, ti nasao a ladawan ket maysa a pammaneknek a nakapanawen ni Guo iti pagilian idi bulan ti Hulyo.
Dinakamat pay ni Cruz a naala ti nasao a ladawan sakbay a nagturong ni Guo idiay Singapore.
Nupay kasta, kinumpirmar ti Bureau of Immigration idi Martes a ni Guo wenno ni Guo Hua Ping ket adda idiay Indonesia.
Itay laeng agsapa ket inwaragawag met ni Department of the Interior and Local Government Secretary Benhur Abalos a tiniliw dagiti otoridad dagiti dua a kadwa ni Guo idiay Indonesia a da Cassandra Li Ong ken Sheila Guo.
Maipalagip nga inwaragawag ti abogado ni Guo a ni Atty. Stephen David idi napalpalabas nga aldaw nga adda pailaeng ni Guo iti Pilipinas ngem inaklonna a saanna nga ammo ti eksakto a paglemlemmengan ti kliyentena.
